Madaxweyne Xasan Shiikh “Waxaan lee yahay ma jirto cid guuleysatay iyo cid laga guuleystay”

0
317

XasanSheekhAndAbdiweli20141031_1Madaxweynaha Jamhuuriyadda Federaalka ee Soomaaliya, Mudane Xassan Shiikh Maxamuud, ayaa ka hadlay go’aankii maanta gaaray Baarlmaanka Federaalka ah ee Soomaaliya.

Madaxweynaha ayaa marka hore u mahad-celiyey dhammaan xildhibaanadda Baarlmaanka “Waxaan rabaa in aan u mahad celiyo dhammaan xildhibaanada kuwa haa ku codeyey, kuwa maya ku codeyey iyo kuwa ka aamusayba , waxaan kale oo ku ammaanayaa oggolaanshaha ay oggolaadeen xeerka u degsan iyo sida ay ugu dhaqmeenba. Waxaan lee yahay ma jirto cid guuleysatay iyo cid laga guuleystay” ayuu yiri Madaxweynaha.

Madaxweynuhu wuxuu bogaadiyey Ra’iisal Wasaare Cabdiweli Shiikh iyo guud ahaan xubnaha Golaha Wasiirrada oo muujiyay dadaal muddadii ay xilka hayeen ayaga oo ku shaqeynayay marxalad adag. Wuxuuna hey’adaha dowladda iyo shacabka Soomaaliyeedba ka codsaday in la siiyo xushmadda ay mudan yihiin.

Madaxwaynaha wuxuu soo dhaweeyay sida ay awooda ugu yeehseen hayadaha dowliga in ay xaliyaan xaaladda siyaasadeed ee soo wajahay dalka iyadoo aanan dibadda laga soo faragelin. Madaxwaynuhu wuxuu ku amray hayadaha aminga in ay foojignaan dheeraad ah la yimaadaan, kana hortagaan cadowga umadda.

Madaxweynuhu wuxuu ummadda Soomaaliyeed u ballanqaaday in aan habac soo geli doonin habsami u socodka howlaha baaxadda leh ee Qaranka oo ay ka mid yihiin la dagaallanka Shabaab iyo xag jirnimada iyo sugidda amniga, wuxuuna si gaar ah u tilmaamay in howlaha leh mudnaanta koowaad oo ay ka mid yihiin dib u eegidda iyo Hirgelinta Dastuurka, dhammaystirka dhaqangelinta nidaamka Federaalka iyo doorashada 2016 oo dhammaantood ka mid ah Higsiga 2016 ay ku qabsoomi doonaan xilligii loogu tala galay.

Si taas loo xaqiijiyana, Madaxweynaha Jamhuuriyadda Federaalka ee Soomaaliya, Mudane Xasan Shiikh Maxamuud, wuxuu ballan qaaday in la tashi ka dib uu sida ugu dhakhsiyaha badan ee suurta galka ah ku soo magacaabi doono Ra’iisal Wasaare hanan kara howsha hortaalla Dowladda si loog dhabeeyo himilada Shacabka Soomaaliyeed.