Wasiirka Cadaalada Puntland oo Booqday Agoonta Gaalkacyo

0
1006

Wasiirka Wasaarada Cadaalada Arimaha Diinta iyo Dhaqan-celinta Dawlada Puntland Saalax Xabiib Jaamac ayaa waxaa uu booqday Xarunta Daryeelka iyo Dhaqan-celinta Agoonta ee Magaalada Gaalkacyo.

Booqashadaani ayaa u jeedkeedu waxaa uu ahaa u kuur galidda Xaalada Agoonta ku xaraysan Kuleejada Gaalkacyo oo kamid ah Kuleejooyinkii ugu horeeyay ee laga furo Deegaanada Puntland taasi oo loogu tala galay Xanaanaynta iyo Waxbaridda Agoonta waxaana la aasaasay 1993 , waxaana Kuleejadu ay soo saartay Aqoonyahan badan oo qaarkood BHD Diyaariyeen.

Wasiirka ayaa Booqashadiisa waxaa ku weheliyay Gudoomiye kuxigeenka Dallada Xarumaha Agoomaha Puntland Sh.Bilaal Caad Godogode, C/razaaq Daahir Afrax Masuulka guud ee Kuleejada Agoonta Gaalkacyo.

Wasiirka ayaa halkaasi waxaa kusoo dhaweeyay Maamulka , Macalimiinta iyo Ardayda Kuleejada oo uu horkacayay Khadar Axmed Maxamed Madaxa Tacliinta ee Kuleejada, waxaana ay soo mariyeen oo uu soo indha indheeyay Qaybaha Kuleejka sida :-

1-Fasalada Waxbarashada.
2-Laabka Computerada.
3-Barxada Kuleejada.
4-Kushiinka ama Meesha Cutada.
5-Qolalka Hurdada.
6-iyo Qaybta Maamulka.

Wasiirku waxaa uu Xogta Kuleejada ka dhagaystay Masuulka Guud ee Kuleejada C/razaaq Daahir Afrax iyo Madaxa Tacliinta ee Kuleejada Khadar Axmed Maxamed , iyo Gudomiye kuxigeenka Guud ee Dallada Xarumaha Agoomaha Puntland Sh.Bilaal Caad Godogode oo uga warbixiyay Xaalada Xarumaha Agoomaha Guud ahaan.

Wasiirku waxaa uu halkaasi kula hadlay Bahda Xarunta oo ay ugu Horeeyaan Ardaydu waxaana uu ku dhiiri galiyay Waxbarashada si ay u noqdaan Hogaanka Barito ee Dalka isaga oo sheegay inay Muhiimad gaar ah siinayaan Agoomaha ku xaraysan Xarumaha Agoomaha ee Puntland.

Si kastabada ha ahaatee Booqashadaani ayaa waxaa ay qayb ka tahay Dadaalada uu wado Wasiir Saalax isaga oo horay u booqday Xarumaha Agoomaha ee Galdogob , Bursaalax iyo Beyra.

Cabdiraxmaan Cabdinuur Cabdulaahi
Gaalkacyo – Puntland – Soomaaliya

AgoontaGaalkacyo20150906_3 AgoontaGaalkacyo20150906_2 AgoontaGaalkacyo20150906_5 AgoontaGaalkacyo20150906_4