Ciidamada Dowladda Oo Howl-Gallo Ka Sameeyey Magaalada Baraawe

0
117

Ciidamada Xoogga dalka Soomaaliyeed ayaa saacadihii la soo dhaafay howl-gallo ballaaran ka sameeyey degmada Baraawe iyo deegaanada hoosyimaada ee gobolka Sh/Hoose.

Howl-gallada oo ahaa kuwa qorsheysan ayaa waxa ay ciidamadu ka fuliyeen deegaano iyo tuulooyin la sheegay inay ku sugnaayeen dagaalyahano ka tirsan Xarakada Al-Shabaab.

Taliyaha ciidamada Booliska degmada Baraawe Dhamme Ibraahim Cali oo u warramay Shabelle ayaa sheegay in howl-galladaasi ay ku beegsadeen goobo ay ku sugnaayeen Al-Shabaab, islamarkaana ay khasaare xoogan ku gaarsiyeen, sida uu hadalka u dhigay.

Sidoo kale wuxuu intaasi ku daray in howl-galladu ay sii socon doonaan, inta Al-Shabaab laga saarayo deegaanadaasi.

Shabeelaha Hoose oo ka mid ah gobollada ay ku xoogan yihiin dagaalyahanada Al-Shabaab ayaa waxaa inta badan ka dhaca dagaallo geysta khasaare dhimasho iyo dhaawac intaba.

Radioshabelle