DF oo la wareegtay deegaan laga soo abaabuli jiray qaraxyada iyo dilalka

0
42

Wararka laga helayo gobolka Hiiraan ayaa sheegaya in maanta ciidamada dowladda Soomaaliya ay la wareegeen deegaanka Booco oo ku dhowaad 50 KM koonfur uga beegan magaalada Beledweyne ee xarunta gobolkaasi.

Ciidamada ayaa lagu soo warramayaa inay gudaha u galeen deegaankaas oo ay muddo 13 sano ah maamulayeen xoogaga Al-Shabaab.

Ilo dadka deegaanka ah ayaa innoo sheegay in wax dagaal uusan ka dhicin halkaasi, isla-markaana xubnaha Al-Shabaab ay isaga carareen, kahor inta aysan gaarin ciidamada.

Saraakiil ka tirsamn milatariga Soomaaliya ayaa sheegay in deegaanka Booco ay fariisimo ku lahaayeen Shabaab, ayna ka soo abaabuli jireen qaraxyada iyo dilalka ka dhaca Hiiraan.

Sidoo kale guddoomiyaha gobolka Hiiraan, Cali Jayte Cismaan oo howlgalka qayb ka ah ayaa ugu baaqay dadka deegaanka inay deganaan muujiyaan, ayna la shaqeeyaan ciidamada dowladda ee maanta la wareegay gacan ku heynta deegaan weynaha Booco.

Xaaladda ayaa haatan ah mid kacsan, waxaana weli dhaq-dhaqaaqyo laga dareemayaa koonfurta Beledweyne, halkaas oo ay ka socdaan abaabulo iska soo horjeeda.

Hiiraan ayaa waxaa ka socda dagaal culus oo ka dhan ah Al-Shabaab, kuwaas oo iska kaashanayaan maleeshiyaadka deegaanka iyo ciidamada Xoogga dalka Soomaaliyeed.

Dowladda Soomaaliya oo boggaadisay howlgalladan ayaa shaaca ka qaaday in lagu dilay ugu yaraan illaa 200 oo ka tirsanaa, tan iyo markii ay bilowdeen kacdoonka shacabka.

Caasimada