Askar wasiir la socotay oo weerar lagu dhaawacay

Bar-Kulan

December 4, 2012 Markacadeey

Inta la og yahay afar askari ayaa ku dhaawacantay weerar gaadmo ah oo maanta lagu qaaday kolonyo gaadiid ah oo uu la socday wasiirka arrimaha gudaha iyo amniga qaranka xukuumadda Soomaaliya Cabdikariim Xuseen Guuleed oo maalmahan ku sugnaa magaalada Marka ee xarunta gobolka Shabeellada hoose.

Maleeshiyo ka tirsan Al-Shabaab ayaa la sheegay in ay ku weerareen gaadiidka uu la socday wasiirka deegaanka Buufow Bacaad, halkaaso miino ay kula qaraxday mid ka mid ah gaadiidkii ciidanka ee ilaalinayay taliyaha ciidanka booliska Soomaaliyeed Shariif Sheekhunaa Maye oo wafdiga qeyb ka ahaa sida ay Bar-Kulan u xaqiijeen saraakiil ka tirsan ciidanka.

Guddoomiyaha gobolka Shabeellada hoose Cabduqaadir Maxamed Nuur (Siiddii) ayaa u sheegay warbaahinta in ilaaladii wafdiga iyo Al-Shabaab uu dhex maray dagaal muddo labaatan daqiiqo ah socday.

Lama oga khasaaraha soo gaaray maleeshiyadii weerarka soo qaadday.

Wafdiga wasiirka ayaa weerarka la kulmay mar ay ku sii jeedeen magaalada Muqdisho.

HOME