Shir caalami ah oo ku saabsan horumarinta wax-soo-saarka Soomaaliya sida xoolaha, beeraha iyo kalluunka ayaa maanta oo Isniin ah ka furmay magaalada Dubai ee dalka Isu-tagga Imaaraadka Carabta.
Hay’adda Qaramada Midoobay u qaabilsan beeraha ee FAO oo ka mid ah hay’adaha shirka soo qaban-qaabiyey ayaa sheegay in ujeeddada shirku tahay in hay’adaha caalamiga ah ee dhinaca dhaqaalaha iyo ganacsatada dunida loo bandhigo wax-soo-saarka Soomaalida.
Shirka oo ay goob-joog ka yihiin xubno ka tirsan dowladda federaalka iyo maamullada Soomaaliya ka jira ayaa lagu wadaa inuu dhiirri-gelin u noqdo maalgashiga lagu sameynayo wax-soo-saarka xoolaha, beeraha iyo kalluumeysiga Soomaaliya.
Hay’adaha soo qaban-qaabiyey shirka ayaa sheegay in waxyaabaha ay dhoofiyaan ganacsatada Soomaalida ah sida xoolaha iyo muuska sanadihii ugu dambeeyey ay aad u kordheen, loona baahan yahay in loo helo suuq-geyn muhiim ah.
Ganacsato Soomaalida oo ka qeyb-galaysa shirka ayaa Bar-kulan u sheegay inay ku rajo weyn yihiin in shirku noqon doono mid sanadle ah si loo dhiirri-galiyo wax-soo-saarka Soomaaliya.
Bar-Kulan
