Qarax nooc cusub ah oo saaka ka dhacay Muqdisho & Wararkii ugu dambeeyey

0
982

Qarax xooggan ayaa saaka waaberigii ka dhacay guri ku yaalla degmada Hodan ee magaalada Muqdisho kaasoo geystay khasaarooyin kala duwan.

Sid wararku nagu soo gaarayaan qaraxan oo laga maqlay meelo badan oo ka tirsan Muqdisho ayaa ka dhashay miino lagu xiray derbiga guri ku yaalla xaafad ku dhow Isbitaalka Erdogan (Ex-Digfeer).

Miinadan ayaa markii ay qaraxday burburisay derbiga guriga lagu dhejiyey, waxaana ku dhaawacmay nin ka tirsanaa qoyskii gurigaas ku noolaa sida ay sheegayaan goob joogayaal ku sugan degaankaas.

Dhowr neef oo ari ah ayuu sidoo kale qaraxaas dilay, kuwaasoo ku jiray mooro jiingado ka sameysan oo halkaas ku taalla, waxaana jira ari kale oo waxyeelo ay soo gaartay.

Lama oga illaa hadda sababta miinadan loogu dhejiyey gurigan derbigiisa iyo cida loola dan lahaa, balse waxaa halkaas gaaray ciidamada amaanka dowlada oo halkaas ka baaritaano ka sameeyey.

Dadweyne fara badan oo ka tirsan degaanka ayaa halkaas isugu soo baxay, iyagoo isweydiinaya qaraxan iyo cida halkaas keentay, waxaana dadka isu baxay ay aad ula yaabeen sida ay goobtaas wax uga dhaceen.

Allbansadir